 |
| Celebration |
Burma rama sipai sawrkar chu thiah a ni ta. Nikum November thlaa an ram inthlanpui neih a nih hnuah, hun rei tak chhung sipai chakna hmanga an ram hruaitu lo ni tawh, Gen Than Shwe chuan sipai rorelna hnuaia an ram rorelna State Peace and Development Council (SPDC) thiah a nih thu hi a puang a, he thu a puan hma hian an ram President atana ruat thar Thein Sein leh sawrkar thar chu rinawmna thu tiam tira lak luh a ni bawk. Burma ram sipai rorelna thiah a nih hnu hian, sipai hotu lu atan General Min Aung Hlaing chu ruat a ni a, an ram hruaitu hlui Gen Than Shwe chuan sawrkar tharah nihna pawimawh a chelh em tih hriat a la ni lo a ni. Burma sawrkar thar hi tukin khan an khawpui Naypyidaw-a Union Parliament-ah lakluh a ni a, President leh Vice-President bakah Cabinet Minister 58-te chu rinawmna thu tiam tira lakluh an ni. Sawrkar tharah hian sipai chakna hmanga an rama rorel a nih laia hruaitu tam tak chu nihna pawimawh chelh zui tura tih ni lo mahse, sipai hotu tam tak chuan sawrkara nihna pawimawh an la chelh chhunzawm zel tho a, heng zingah hian an President thar, Thein Sein pawh hi a tel a, President thar hian hun rei tak chhung PM dinhmun a lo chelh tawh a, hetiang a nih avang hian mipui rorelna ram tak tak anga an kal ring lo an la tam zawk a ni.
Source:
Zonet 
