CADS ten mi kutthlak

Nimin (March ni 30, 2011) khan Bawngkawn Local Council leh Central YMA hruaitu zinga mi pali chuan Bawngkawn Zawlbukah an inhmukhawm a. Central YMA aiawha kal te leh Bawngkawn khawtlang hruaitute chuan Central Anti Drugs Squad (CADS)-in Bawngkawn mi pathum an vuak chungchang an sawi niin thudawnna chuan a sawi.

Pathianni kalta (March ni 27, 2010) chawhnu dar 3:15 bawr khan an ina haw tur Peka chuan CADS duty zinga patling lam deuh tawh pakhat chuan Cinema hall hlui bul a thlenin a ko emaw tiin a va pan hnaia, a bulhnai a thlen veleh CADS duty zing ami chuan a bekah a lo hnek nghal ringawt a, chuta tang chuan buaina a chhuak tan niin thudawnna chuan a sawi a. An intihbuai lai hian ban phar meuha thelh tum zingah Bawngkawna kumpuan committee member pawh an tel nia hriat a ni bawk. Mahse, Bawngkawn Zawlbuk lamah thurem mai an duh thu an sawi pawhin CADS lam chuan, “Kan office pawh a nilo,” tiin a thelh tum zinga awm kut tuar ve pakhat chuan Evening Post a hrilh. � Bawngkawna an buai zawh hnu lamah CADS chuan sumo hmangin Peka leh a thianpa, thelh tuma ban lo phar zing ami Dawnga bakah Tawnga te pathum chu Central YMA Office, Tuikhuahtlangah an phur phei a. CYMA office-ah chuan an luh veleh pheikhawk leh mawza te phelh tir hnuah chuan kut an thlak niin thudawnna chuan a sawi a. An vuak zinga pakhat chuan an vuak nasat viau thu a sawi �bawk a ni.�

DAWNGA MALA SER AWM CHU

He buaina thu an hriat veleh Bawngkawn Branch YMA hruaitu thenkhatin Central YMA office an pan nghal a. Mahse, an awm lai pawhin vuak an thulh phah chuang lo niin thudawnna pakhat chuan a sawi. He buaina chungchangah sawihovin nimin chawhnu khan Bawngkawn Zawlbuk-ah Local Council leh Central YMA hruaitu aiawhin mi pali te an inkawmkhawm a. He hunah hian Central YMA aiawha kalte’n thil thleng chungchangah ngaihdam an dil a, pawi an tih thu an sawi niin thudawnna chuan a tarlang a. Bawngkawn Local Council lam pawhin Bawngkawn Veng huam chhungah an duty leh dawn a nih chuan Local Council-ah emaw, YMA-ah emaw hriattir tawh turin an ngen niin a sawi bawk a ni.�

PEKA HNUNGZANG VE THUNG

Bawngkawn Zawlbuka an thuhkhawm hnu hian, Central YMA aiawha kal te hian CADS kut tuara awm mi pathumte inah chuan an leng theuh a. Hetah hian in kanna’n tiin Rs. 1000 theuh an pe niin thudawn a ni. Bawngkawn Branch YMA pawhin he thu hi ngaihtuah an tum nia hriat a ni a, an Branch President zin lo haw hunah a rang lamin emergency committee an ko dawn niin an sawi bawk.

Source: CHDA