2G Spectrum lilamnaa thil dik lo intanna chu Swan Telecom leh Loop Telecom company-te an nih thu CBI-in Supreme Court-a hrilh. CBI hian vawiin khan 2G Spectrum lilamna chungchang an chhuina report thenkhat chu Supreme Court-ah an thehlut leh a, he an report thehluhah hian he thila mawhphurtu bera puh, Telecom Minister hlui A Raja chu mi bum, eiruk leh dan kalha thil tia puhna thubuai an siamsak dawn niin an sawi a, hetianga dik lo taka 2G Spectrum lilamna-ah hian Reliance Group (ADAG) leh Essar chuan Swan Telecom leh Loop Telecom company-te chu hmathehah an hmang niin an sawi bawk. CBI chuan he thubuai an chhui lai hi kumin May thla chhungin an zawh hman tur thu Court sang ber chu an hrilh a, thubuai hmasa ber chu thla leh ni 2-ah an thehlut dawn tih sawiin, an thubuai thehluh hmasak ber turah hian Telecom Minister hlui, A Raja leh midang 3-te chungchang chiang taka tarlan an tum thu an sawi a ni. CBI aiawha Court a ding, Ukil KK Venugopal chuan an thubuai thehluh turah hian Phone a inbiakna an lakkhawm thenkhat chu thu hretu a hman theih nghal tura rintlak a ni dawn niin a sawi a, thubuai hrang hrang thehluh turah hian finfiahna tha tawk an nei tawh niin a sawi a ni.
Source: Zonet
