Mizoram Assembly Budget Session zawh ni, vawiin khan kumin sorkar kum chhunga sum indaih lohna phuhrukna tur, Supplementary Demand for Grants Rs. 8,17,11,48,000/- pass a nih bakah sorkar kum thar thla 4, April atanga July thla thleng sum hman tura ruahman, Rs. 13,54,27,78,000/- te chu lungrual taka pass an ni. Heng Demand-te hi Chief Minister, Finance changtu, Pu Lal Thanhawla put luh a ni a, hemi hnu hian a hmanna tur Bill 2 te pawh pass nghal an ni. Hemi hma lam hian heng demand 2 te hi rei lote chhung sawiho ni a, hetah hian kumin sorkar kum chhunga hman tur sum dil belh a tamna chhanah opposition member-te chuan sorkar demna thenkhat an sawi chhuak a, Speaker Pu R. Romawia chuan tuna finfiah theih loh thila House a inpuhmawh chu thil tul lo a ni tih sawi chhuakin chutiang lam sawi zel tumtute a khap a, hemi hnu hian Transport Minister, Pu PC Zoramsangliana chuan member-te chu Pu K. Liantlinga Unstarred Question No. 15-na chhanna en-a kum 2001 atanga kum 2011 thlenga Mizoram sorkar leiba pun chhoh dan hre thiam turin a ngen a ni. Sawihona tlangkawma thusawitu, Chief Minister Pu Lal Thanhawla chuan sorkar tha leh rorelna tha nei tur chuan sum hman thiam leh hmanthat a ngai a, sum min petute duh dan ang lova thil danga hman dawn pawhin Divert phalna lak a ngai thin a, hun hmasa lama Police Modernization sum hman dik loh angte kha he sorkar hnuaiah hian a awm dawn tawh lo tih sawiin, nikum financial year tawpa sum hman loha liam ta hmuh let leh loh chu Rs. 12,00,00,000/- vel niin a sawi bawk.
