March ni 14, 2011 khan Chief Minister zahawm tak, Pu Lal Thanhawla chuan Khawzawl Vengtharah State Bank of India Branch thar a hawng a. Pu Hawla chuan, “Mizote hi sum khâwl thiam lo tak, neih ang ang khawhral mai mai chîng, bank-a leíbat chîng tak leh leibâ rulh hlamchhiah chîng tak ‘ringtu’ kan ni a, rinawmna hi kawng engkimah kan ti lang tur a ni” tiin, loan pûk rulhna châng hre lo an awm thu leh, ZIDCO phei chu leiba bâwmah chhuah a nih der thu te, leiba rulh lama thanharh a tul thute a sawi.
Mizorama bank lem hawngtu pakhat phei chuan ‘Thlarau thianghlim’ kâwrah hmangin a sumdawng niin Pu Hawla chuan a sawi a, “An hnena loan lakna interest rate a san êm avangin Mizo zingah leiba ngah tam tak an awm phah a, hemi lakah hian inven a tul takzet a ni” a ti. CM hian ‘bank lem’ laka fimkhurna tur thu a sawi hi a vawi khat sawina mai a ni lo va, a Cabinet zinga mite paw’n an sawi fo thin.
Ram khat hotupa berin a khua leh tuite himna tur kawng niawm tak ngaihtuah sakna châng hria a, fimkhurna tur thu a sawi hi, CM tih atana thil inhmeh leh mawî tak a ni awm e. Hêng, ‘bank lem’ laka fimkhur ngai zâwka te hlei hlei hi a rethei zawka te kan la ni ta dah a! Fimkhur hlê tura kan hotupa berin min ngen fo hi; thil tihâwm tak, fuihna zahawm tak, fimkhur phah ngei nana hman ni thei se kan him phah phian awm e.
Hetih rual hian kan hotupa thusawi hi ngaihtuah zui ngaî tak a awm a. Mizote chu leiba rulh hlamchhiah chîng tak, ringtu (kristian); neih ang ang khawhral mai mai chîng anga duhâm taka a sawi hi, a huamzau tir mah mah em? tih ngaihdan a awm thei. CM thusawi hi hnam dang, Hindi leh Saptawng changchinbu-ah te a nihna ang ang hian tarlan ni ta se, hnam dangte min hmuh dan tur chu engtiang chiaha chhe lehzual a, lem (duplicate) nge kan nih ang? Hnam dang mit hmuh leh beng hriat tura ‘rinawmna rêng nei lo’ ang maia mahni Mizopuite hotupa berina a puh thu, mipui pungkhawm hmâ-a, ‘sum-ruk(6) kaptu-pa tlâng-tlir leh thâwr’ mai thin hi, a ‘second thought’ neih loh thlak, ti pâwl pawh a awm theih awm e!
