Ivory Coast tualchhung buaina kal zelah sawrkar lamtangte an chep tan tawh avangin an ram President Laurent Gbagbo-an inkahhai a puang. Puan tawh thin angin, Ivory Coast ram hian nikum November thlaa an ram inthlanpuiah, eptu pawl hruaitu Alassane Ouattara chu President atan thlang tling mahse, President ni lai Laurent Gbagbo chuan thuneihna a hlan duh lo a, hei vang hian an ramah buaina a chhuah phah a, mi 462 chuang an thih tawh bakah mi maktaduai 1 chuangin an ram an chhuahsan a ni. He buaina chhuakah hian a tirah sawrkar lamtang-te dinhmun tha zawk mahse, eptute hi an rama hel pawl lian berin an puih hnuah eptute hian an ram khawpui tam tak an la tawh a, hetianga sawrkar lamtangte an chep zawk takah hian President Laurent Gbagbo chuan UN leh African Union-te phut angin inkahhai a puang a, President thupuangtu, Ahoua Don Mello chuan an ram tualchhung buaina chingfel tur hian African Union kaihhruaina hnuaiah eptute nena remna zawnga an inbiak theih thuai an beisei tih sawiin, inkahhai an puan hnuah eptute hian sawrkar sipai leh sawrkar lamtangte kut an thlak zui chuan sawrkar chuan himna zawnga inven zui zel a tum tho thu a sawi a, sawrkar chuan tualchhung buaina neih zui zel a duh tawh lo niin a sawi a ni.
