Chief Minister Pu Lal Thanhawla’n Land Revenue & Settlement Dept. a Surveyor-ten ram tam tak an nei nia sawiin, an thil tih dan dik lo hi ACB emaw CBI emaw chhuitir a tum thu House a hrilh. MNF member, Pu B. Lalthlengliana’n Periodic Patta 304/1976 huam chin, dik lo taka mi dang pek tumna a awm em tih a zawhna leh he thilah hian CM a inrawlh nia sawi chu chhangin CM chuan, a nu leh a pa zarah ram a mamawh loh thu te, he ram chungchangah hian inrawlhna a neih loh thu leh kumin February ni 12 khan an ram, a nu leh pa hun lai atanga an neih tawh chu Surveyor-ten an lo ser ringawt niin a sawi a, hemi tum hian Zemabawk atanga Silaimuala chhuak, World Bank kawng chu hre chiang tura a zawh thu a sawi bawk. Chief Minister chuan Revenue Dept. chu buarchuar leh tawp lutuk, siam tha tura Revenue Minister-in tan a lak mekna niin a sawi a, thil ti dik lo tam bertu chu Surveyor ho niin a sawi bawk. He zawhna chhangtu Revenue Minister, Pu JH Rothuama chuan he ram Periodic Patta huam chhunga mi chuhtu hi PC Zofakawma a ni a ti a, he ram hi a buai lo niin a sawi bawk. Hemi hma lama Pu B. Lalthlengliana’n ram chuh buaitu Patta neih chu Patta lem nia a tarlan chu a kuta hlan turin Speaker, Pu R. Romawia chuan Pu B. Lalthlengliana chu a ngen bawk a ni. Vawiin khan tun session leh session hmasa inkara MLA hlui thi, Pu B. Tevo sun a ni a, CM, Pu Lal Thanhawla’n Pu B. Tevo-a chanchin tlangpui sawiin, Zawngling lal thi tawh, Pu Kolai fa 3 zinga a naupang ber, kum 1949 April ni 11-a Zawnglinga piang a nih thu a sawi a, PUC a zawh hnuah Chheihlu Middle School-ah Headmaster a ni a, kum 1977 khan Congress a zawm a, hemi kum hian MDC-ah thlan tlin a ni a, Executive Member a ni nghal a, kum 1983-a MDC thlanna-ah khan thlan tlin leh a ni a, Executive member a ni leh a ni a ti. Kum 1991-a Tuipang biala Assembly by-election neih khan Congress ticket-in MLA atan thlan tlin a ni a, mi tha, zaidam, vantlang rawngbawlnaa inhmang mi, mipuiin an ngaihsan em em a ni a, Cancer a vei tak avangin nikum October ni 15 khan Aizawl Hospital-ah kum 61 mi niin a thi a ni tih a sawi a ni.
