Israel President hlui, Moshe Katsav chu hmeichhe khuaikhem chungchangah kum 7 chhung tang tura tih a ni. Tel Aviv khawpuia a chungthu ngaihtuahtu Court chuan, Moshe Katsav hi a hnuaia thawk thin hmeichhe 2 pawngsual chungchang bakah, mipat hmeichhiatna lam hawia mawi lo taka mi dang chhaih chungchang leh a thuneihna hmang suala puhna thubuaiah thiam loh a chantir a, Court President, George Kara chuan, Moshe Katsav-a chunga Court thutlukna hi sawrkara nihna pawimawh chelh avanga mi dang tana harsatna siam chingte chuan inzir nan hmang se an duh thu leh, an President hlui hi kum 7 chhung tang tura tih a nih bakah hian, a hmeichhe khuaikhem pakhat zawk hnenah zangnadawmna dollar 28,000 pe tura tih a ni bawk tih a sawi. Court-in a thutlukna a puan lai hian Moshe Katsav hi a tap chhuak hial a, a khuaikhem nia insawi hmeichhiate chuan thu dik lo an sawi nia sawiin, Court-in thu dik lo chu a din chantir ta zawk niin a sawi a ni. Tuna kum 65 mi, Katsav-a hi kum 2000 atanga 2007 thleng khan Israel President a ni a, nikum December thla khan Israel Tourism Ministry-a thawk, hmeichhe pakhat, tum hnih pawngsualah leh President inah pawh hmeichhe dang pakhat laka mawi lo taka che-ah puh a ni a, Tel Aviv district court-a roreltu pathum chuan President hlui hi a thil sual tih dan enin, khawngaihna beisei thei a ni lo tih hmaichhanah an hrilh a, hetianga pawi a khawih avang hian mi dang ang bawkin a tuar ve tur a ni, an ti bawk. Moshe Katsav-a hi a thlahtute lamah chuan Iran ram atanga Israel rama pem lut an ni a,
Read more »
