| Kum 2010-2011 Financial Year chu March ni 31 khan a tawp ta a, hemi hun chhung hian sum hman loha sum liam (lapse) a awm hriat a nih loh thu Principal Secretary (Finance) Lalmalsawma, IAS chuan a sawi. ‘Sum lapse a awm thu report kan la dawng lova, a awm a nih pawhin a tam tham lo turah kan ngai,’ tiin Lalmalsawma chuan a sawi a. Kumina sum lapse a awmlohna tur hian Finance Department chuan theihtawp chhuaha tan a lak thu a sawi bawk. 2009-2010-ah khan Mizoram sorkar sum vbc 72 deuhthaw chu hman hman lohin a liam (lapse) a, hei hian thawm a neih rin em avangin sorkar chu nasa takin a inpuahchah a, sum hman hman loh te pawh civil deposit (K deposit)-ah engemaw zat dah hman nia thu dawn a ni. Sum lapse a awm lohna tur hian Finance Department chuan February ni 9, 2011 khan office memorandum siamin department zawng zawngte chu sum thehluh hun tur a biktuk sak a. Plan fund, CSS, NLCPR leh thil dang zawng zawng chu March ni 11 hmaa State Planning Board-a proposal siam vek tur leh administrative approval leh expenditure sanction zawng zawng pawh March ni 21 hmaa Finance Department-a thehlut vek turin an hriattir bawk. Heng proposal zawng zawng te hi March ni 25-ah chuan Treasury-a thehlut vek tur leh, hemi huna thehluh hman loh a awm a nih chuan March ni 30-a Treasury-a thehlut vek turin an hriattir bawk a, March ni 31-ah chuan annual budget chhunga bill leh thil dang zawng zawng chu tifel vek turin an hriattir bawk a ni. Hnawhsaruma thil tih a ngaih lohna turin State Purchase Advisory Board leh Department Purchase Advisory Board zawng zawngte chu March ni 28 hmaa meeting vek turin an hriattir bawk a ni. He office memorandum hi department te chuan an zawm tha hle niin finance secretary chuan a sawi a. Planning Board-in approval a pek tlai avanga bill thehluh hun tura an ruata thehlut hman lo department te chu anmahni minister te hnenah sawi a, chumi hnu-ah chief minister, finance changtu hnena thlen leh turin an hriat -tir tih a sawi bawk a ni. Sum lapse a awm loh chhan pakhat chu Treasury ten nikhata sum an pekchhuah theih zat (ceiling) an tihsan tak vang a ni pakhat tih Lalmalsawma chuan a sawi a. ‘Amaherawhchu, Reserve Bank of India (RBI) -a kan cash balance en chunga ceiling hi kan siam a ngai a, chutilo chuan overdraft mai a hlauhawm a ni,’ a ti. Sum chetvel dan chu uluk zawka an vil thu principal secretary chuan a sawi bawk a ni. Source: Thezozamtimes |
Principal Secretary (Finance) Lalmalsawma'n Sum lapse a awm lo ti
